तीन महिन्यांपासून गाडी घरातच होती...बाहेर काढली अन् वाढले पेट्रोलचे दर; मिशन बिगिन अगेनला इंधन दरवाढीची सलामी

अकोलाः शहरात जवळपास तीन महिन्यांपासून लॉकडाउन सूरू होते. आता मिशन बिगिन अगेन सूरू झाले. मात्र, तीन महिन्यांपासून दारात उभी असलेली गाडी आज घराबाहेर काढली अन् चक्क 1.15 रुपयांनी पेट्रोलचे भाव वाढलेले आढळले. कामावर जायचेय, बाजारात जायचेय मात्र, प्रतिलिटर 1.15 रुपये अधिकचा भूर्दंड आज ग्राहकांना बसला. 

सलग दुसऱ्या दिवशी पेट्रोल आणि डिझेलच्या दरात वाढ झाली. अकोल्यात आज पेट्रोल 58 पैशांनी महागलं. यामुळे शहरात एक लिटर पेट्रोलचा दर 79 रुपये 62 पैसे इतका झाला आहे. खरं तर हा जुन महिन्यातला उच्चांकी दर म्हणता येईल. तर डिझेलच्या दरातही 55 पैशांची वाढ झाली आहे. यामुळे प्रति एक लिटर डिझेलची किंमत 68 रुपये 50 पैसे इतकी झाली आहे. गेल्या 80 दिवसानंतर काल पहिल्यांदाच पेट्रोल आणि डिझेलच्या दरात वाढ झाली नव्हती. त्यानंतर काल रविवारी पेट्रोल आणि डिझेलच्या किंमतीत प्रति लिटर 57 पैशांची वाढ झाली होती. त्यानंतर आज पुन्हा एकदा पेट्रोल आणि डिझेल 55 पैशांनी महाग झाले आहे.

अकोला जिल्ह्यातील बातम्यांसाठी क्लिक करा

दरम्यान, मिशन बिगिनचा तिसरा टप्पा आजपासून (ता.०8) सुरु झाला आहे. पुनश्च ‘हरीओम’ या अभियानांतर्गत राज्य सरकारने शासनाने टप्प्या टप्प्याने लॉकडाऊनमधील निर्बंध शिथिल करण्याचा निर्णय घेतलाय. या निर्णयानुसार आजपासून तिसरा टप्पा सुरू झाला आहे. यामध्ये खासगी कार्यालये तसेच सार्वजनिक दळणवळण सेवा सुरू होणार आहे. सर्व दुकाने,  मार्केटस् ठराविक वेळेपर्यंत खुली राहणार आहेत. त्यासोबतच सार्वजनिक दळणवळण सेवा सुरू होणार आहे.

1 जूनपासून राज्यात ‘मिशन बिगीन अगेन’ला सुरुवात झाली. तर शनिवारपासून राज्यभरात या मिशनचा दुसरा टप्पा सुरु झाला आहे. राज्य सरकारनं शुक्रवारपासून काही अटींवर दुकानं सुरू करण्याची परवानगी सुध्दा दिली आहे.

त्यातच अशी महागाई सामान्य माणसाला अजिबात परवडणारी नाही. गेल्या काही दिवसांपासून अनेक जणांचे खाण्याचेही वांदे झालेत. मात्र आता पेट्रोल दरवाढीने आणखीनच धडकी भरली आहे.